-Avante é unha organización formada por persoas LGBT+ que teñen inquietudes máis alá do marco de representación e visibilidade que buscan algunhas organizacións tradicionais. Nos buscamos a completa liberación do colectivo LGBT+, e comprendemos que non será posible sen darlle á nosa loita un enfoque anticapitalista, feminista e galeguista.
Como chegache a ser o responsable de organización?
En outubro do ano pasado realizouse en Compostela unha asemblea nacional á que asistiron membros de Avante de todas as localidades nas que estamos constituidas. Ao longo de todo un día de intensos debates definimos as liñas ideolóxicas e organizativas que seguiría Avante a partir dese momento. Ademais, co fin de funcionar de xeito máis eficiente a nivel nacional realizouse unha votación por listas abertas para escoller quen formase parte da Coordinadora Nacional. Nesa votación saímos escollidas 7 persoas, e máis tarde sumouse unha persoa extra por cada localidade a modo de representante local na Coordinadora. Para repartir o traballo, na primeira reunión da Coordinadora Nacional repartironse distintas responsabilidades (de comunicación, institucional, de deseños, de organización, etc.) en base á experiencia de cada membro da coordinadora. Eu xa levaba dende facía meses ocupandome de xestionar as bases de datos da organización e coordinando as distintas localidades entre sí, así que decidimos que o óptimo sería que asumise a responsabilidade de organización e continuase a facer ese traballo.
Que é BDSGaliza?
BDS é o acrónimo de "Boicote, desinvestimentos e sancións". É o nome dunha organización que loita polos dereitos do pobo palestiniano. Esta organización xorde dunha petición das propias palestinianas que lanzaron a todo o mundo, pedindo que quen puidese se organizase de xeito autónomo para pedir boicotes contra o goberno de Israel ata que rematase a ocupación e os agravios contra os dereitos humanos do pobo palestiniano. Deste xeito existen BDS en moitas nacións do mundo, cooperando entre sí, máis funcionando de xeito autosuficiente.
Como ves o futuro do colectivo LGTBIQ+ en Galiza?
Están a xurdir moitas iniciativas interesantes que sumadas a outros colectivos históricos que están a recuperar forzas deixa entrever un importante fortalecemento do colectivo LGBT+ galego que loita polos seus dereitos. A medio prazo vexo no horizonte a necesidade de coordinarnos todas as que estamos a loitar por uns obxectivos comúns formando algunha especie de plataforma LGBT+ galega. Agora que se achegan unhas novas eleccións autonómicas pode ser o momento de pular para conseguir a aprovación dunha lei de identidade de xénero galega, lei que tumbou o PP cando fora proposta, así como tamén debemos dotar de contido real a lei 2/2014, que mutilada como está non deixa de ser unha simple declaración de intencións.
Como ves a situación do pobo palestino en dez anos?
a verdade é que é unha pregunta moi complexa e non che sabería dar unha boa resposta agora mesmo, porque a situación neste momento é moi volatil e muda duns meses pra outros. O que teño claro é que a presión internacional contra o apartheid que sofre o pobo palestiniano é imprescindible para que a situación mellore
Crees que esta sociedade ten solución?
A solución aínda está moi lonxe e virá de man dunha mudanza da correlación de forzas entre países a nivel internacional. Mentres dure a hexemonía de Estados Unidos e o seu interese polo petroleo de Oriente Medio seguirá a manter protexido e ben armado o goberno de Israel e será imposible reverter a ocupación e devolverlle as súas terras ás palestinianas. Mentres iso non ocorra o que podemos e debemos facer é loitar para que as vidas das palestinianas sexan máis vivibles. Para que os asasinatos e privacións de liberdade e dereitos básicos que sofren cesen é moi importante que Israel non sexa impune, e facendo boicote aos seus produtos, boicote académico, e presionando aos nosos gobernos para que lles impoñan sancións, podemos mellorar a situación.
Que é para ti o día de Galicia?
para min "día de Galicia" é un termo totalmente despolitizado e baleirado de contido. O 25 de xullo é o día da patria galega, o día escollido polas irmandades da fala fai 100 anos para sair ás rúas a reivindicar os dereitos nacionais do pobo galego. O dereito a dirixir nos mesmas o noso futuro, xestionar os nosos recursos, e poder vivir libremente na nosa lingua e coa nosa cultura. Unha xornada de reivindicación e loita que segue a ser profundamente necesaria.
Comentarios
Publicar un comentario